Илыме верым чоҥымаш 18 процентлан кушкын

Теҥгече Марий Элым вуйлатыше «Илыме вер да оласе кумдык» калыкле проектым шыҥдарыме йодыш дене совещанийым эртарен. Вашлиймаште Правительствын еҥже- влак, муниципал образованийлам вуйлатыше да министерствын еҥже- шамыч лийыныт. Калыкле проект кышкарыште регионысо ныл проект шыҥдаралтеш. Тиде «Илыме вер», «Ипотека», «Оласе йӧнан кумдыкым ыштымаш» да «Илаш йӧрыдымӧ пӧртым пытарымаш».  Чоҥымаш министрын сомылжым шуктышо Светлана Павлова Александр Евстифеевлан илыме верым чоҥымо паша да шуко пачеран пӧртлаште илыме верым сдатлыме нерген увертарен. Тудын мутшо почеш 2019-ше ийыште 400 тӱжем квадрат метрым але ончычсо ий дене таҥастарымаште 118 процент илыме верым ыштен шуктымо. Шке чоҥышо- влак 162 тӱжем квадрат метрым ыштен шуктеныт але тӱшка кугыт гыч 40 процентым. Светлана Павлова ешарен: тений показательым 420 тӱжем метрыш шукташ палемдыме. Сай вашталтыш январьын лектышыже почешат коеш. Чатлама тылзын 15 тӱжемат 500 квадрат метрым ыштен шуктымо. Кодшо ийысе деч тидыже 137 процент лиеш. Республикым вуйлатышын мутшо почеш, тачысе кечылан чоҥымо да пайдаланыме, но тӱрлӧ амал дене юридически эксплуатацийыш налдыме илыме вер- влак показательым вашталтен ончыктат. Каҥашыме вес теме: илыме верым чоҥаш район да рӱдолан ойырымо мланде участкын ситымыже. Мэр Евгений Масловын мутшо почеш, ола тошто кварталлам уэш кучылтмо да у кумдык- влак кӱшеш кушкеш. Кызыт чоҥаш тӱҥалаш корнын да инженер инфраструктурын улыжым шотыш налыт. Сандене тошто пӧртла кундымыште шукырак чоҥат. Республикым вуйлатыше мланде участке- влакын реестрыштым ышташ кӱштен. Ола тӱр шотышто посна мутланымаш лиеш,- каласен Александр Евстифеев. Совещанийыште тыгак Козьмодемьянск олан мэржын, Волжск администрацийын сомылжым шуктышын, Медведево да Звенигово район администрацийлам вуйлатыше- влакын докладыштым колыштмо.