Федерал корно агентствым вуйлатышын алмаштышыже Игорь Костюченко регион- влак дене селектор совещанийым эртарен
Российысе регион- влак калыкле проектын тений шуктышаш пеле утла объектшылан контрактым ыштеныт. Регион- влакын корным чоҥымо да олмыктымо у тургымлан ямде улмыштым «Лӱдыкшыдымӧ да сай качестван автомобиль корно- влак» калыкле проектым шыҥдарыме шотышто Россий кӱкшытан селектор- совещанийыште каҥашыме. Видеоконференцсвязь йӧн дене чыла регионласе проект команде-шамыч дене мутланымашым Федерал корно агентствым вуйлатышын алмаштышыже Игорь Костюченко эртарен. Эн ончыч 2019-ше ийыште шуктымо пашам иктешленыт. Олмыктымо чыла объектым терген лекман, гарантий почеш кушто тӧрлаш кӱлеш гын, ситыдымашым вашке кораҥдыман, манын каласыме. Вес кӱлешан йодышыжо- шке жапыштыже, шошо тӱналмеш, контрактым ыштен шуктымаш. 12-шо февраль марте палемдыме пашан 70 утла процентшылан ойпидышым ыштыме. Тыдан годымак 8 кундем 10 процент объектлан гына контрактым ыштен. Чыла кундемыштат корным олмыктымо тургым сай игече толмек тӱҥалшаш. Кугу тӱткышым корно пашан качествыжлан ойыраш кӱлеш. Тыгак тений «Кӱвар да путепровод- влак» проект тӱналшаш. Тудын почеш ныл тӱжем наре кӱварым, 480 утла путепроводым олмыкташ, 22 у кӱварым чоҥаш палемдыме. Калыкле проектыш пуртымо эше ик тӱналтыш- «Сеҥымаш урем» проектым шыҥдарымаш. Тудо Кугу сеҥымашын 75 ияш лӱмгечыжлан пӧлеклалтеш. Тений Сеҥымаш але сарын геройжо- влак лӱмеш лӱмдымӧ урем, проспект але площадь- влакым олмыкташ палемдыме. Совещанийыш погынышо- влак тыгак пашам шуктымо дисциплиным кугемдаш кӱлеш манын каласеныт.
