Озаҥ олаште марий тӱвыра кече- влак эртат

Озаҥ оласе Калык- влакын келшымаш пӧртыштышт Марий Элын 100 ияш лӱмгечыже вашеш «Татарстан ден Марий Эл»: тӱвыра да историй кыл» конференций эртен. Тудлан тӱҥалтышым Татарстанысе марий общественность ыштен. Республикым вуйлатышын саламлымашыже дене Марий Эл правительстве председательын икымше алмаштышыже Михаил Васютин палдарен. Тӱвыра министр Константин Иванов кок республике кокласе кыл нерген докладым ыштен. Погынышо- влак марий калык дене кылдалтше ятыр йодышым каҥашеныт. Марий сӱретче- влакын выставкышт почылтын, концерт лийын. Татарстаныште марий тӱвыра кече- влак 21-ше февраль марте шуйнат. Тиддеч посна тушто идалык мучко тӱрлӧ мероприятий- влак лийшаш улыт.