Йошкар-Олан мэрийыштыже Сомбатхей ден Ширяйково микрорайонлам ушышаш магистральым чоҥымо нерген мутланыме
Йошкар-Олан мэрийыштыже пресс-конференций эртен. Тушто Сомбатхей ден Ширяйково микрорайонлам ушышаш магистральым чоҥымо нерген мутланыме. Правительстве председательын икымше алмаштышыже Александр Сальников проект нерген кумданрак каласкален. Магистральын кужытшо ныл меҥге утла лийшаш, кумдыкшо ныл полосан 15 метран лиеш. Кок велымжат кум метран тротуар- влак лийшаш улыт. Кум верыште корно йымачын йолын вончымо вер ышталтшаш. Изи Какшан эҥер гоч 200 метр кужытан кӱварым, кӱртньӧ корно гоч 470 метр кужытан эстакаде лйшаш. Проектын тичмаш акше ныл миллиардат 700 миллион теҥгеш шуэш. Магистраль мучко тӱшка транспорт чарныме 9 остановко чоҥалтшаш. Варарак тиде корно дене троллейбус кошташ тӱҥалшаш. Пӱнчерым арален кодымо шотышто Александр Сальников ӱшандарен ойлен: пушеҥгым да кушкылым корно шуйнышаш верыште гына пӱчедат. Калыкын каналтен кошташ йӧратыме ужар кумдыклан эҥгек ок ышталт. Тений тиде корным чоҥаш 490 миллион теҥгем ойырымо.