Куэ пырням йотэлыш ужалымылан бизнесъеҥым эрык деч посна коден кертыт

Марий Эл гыч бизнесъеҥ Эрвел Азийыш стратегически кӱлешан поянлыкым колтылын. Республикысе следствий виктем Азийыш чодыра материалым закондымын колтышо 35 ияш бизнесмен шотышто уголовный пашам шымлен пытарен. Тудо 2018-ше ийын январь гыч сентябрь марте йотэл компаний дене ыштыме контракт почеш, чек вес велыш куэ пушеҥгым колтылын. Россий правительствын пунчалже почеш куэ стратегически кӱлешан ресурслан шотлалтеш. Таможенный постыш пушеҥгым налме шотышто шояк уверым ончыктышо декларацийым пуэн. Тыге Российын таможня чекше гоч кок тӱжемат 400 кубометр пушеҥгым луктын. Тудын акше 7 миллион наре теҥгеш шуын. Уголовный пашам судыш колтымо. Амалкалчым 7 ийлан эрык деч посна коден кертыт.