Каратэ кучедалмаш дене Марий Элын чемпионат ден первенствыже эртен
Йошкар-Олаште «Спорт наркотик ваштареш» ӱжмаш дене каратэ дене кучедалмаш эртен. Марий Элын чемпионат ден первенствыже теннис кортышто лийын. Турнирын почётан унаже семын наркотикым шаркалымым тергыше виктемын да МВД-н Йошкар-Ола виктемжын сотрудникше- влак лийыныт. Тиде таҥасымаш Российын чемпионат ден первенствышкыже ойырен налме йыжыҥ семын шотлалтын. Турнирыш Марий Эл да Киров область гыч 150 наре кучедалше ушнен. Нуно кумите да ката йӧн дене кучедалыныт. Наркоконтроль виктем вуйлатышын алмаштышыже Эдуард Хасанов палемден: физкультура да спорт дене кӱрылтде кылым кучымаш кӧргӧ куатым гына огыл пеҥгыдемда, тыгак психоактивный вещества- влак ваштареш шогымо пеҥгыдылыкым вияҥда. Участник- влаклан таза илыш- йӱлам кучаш да спортышто у сеҥымашлашке шуаш тыланен ойлен.