Тенийсе лӱмлӧ дате- влаклан кӱлеш семын ямдылалтман. – Республикым вуйлатыше совещанийым эртарен

Марий Элым вуйлатыше Александр Евстифеев лӱмлӧ дате- влак- Кугу Сеҥымашлан 75 ий темме да республикын 100 ияш лӱмгечыжлан ямдылалтме да Йошкар-Олаште лийшаш мероприятий- влак шотышто совещанийым эртарен. Поснак тудо туризм сферылан тӱткышым ойырен. Тений уна- влак эшеат шукырак лийшаш улыт манын. Оласе корным олмыктымо, пӧрт пырдыж- влакым сылнештарыме, каныме вер- влакым тӱзландарыме, кушкыл ден пеледышым шындыме, транспортын пашажым саемдыме йодыш- влак ончыко лектыт да ешартыш оксам йодыт. Тыгак пайрем мероприятий- влакын эртыме маршрутыштым рашемдаш кӱлешым палемдыме. «Бессмертный полкым» чумырымо годым, колонно дене эртымешке, кок шагат дене йӱр але когартыше кече йымалне калыкым шогыкташ ок кӱл манын тудо. Адакшым тротуар ден зданий пырдыжлам да «Сеҥымаш» мутым возыман чыла объектым шотыш кондаш кӱштен. Тидын годым «Сеҥымашын 30-шо идалыкше лӱмеш» тӱвыра полатым ушештарен. Архитектур да историй шотан пӧрт- влакым тӱжвач волгартараш кӱштен. Тӱвыра министрлан посна задаче- влакым палемден. Но ямдылалтме пашашке чыла министерстват ушнышаш манын каласен.