Олмыктымо эн кӱлешан ныл корным палемдыме
Республикыштына «Лӱдыкшыдымӧ да сай качестван автомобиль корно- влак» калыкле проект почеш кодшо ийын олмыктымо ойыртемалтше ныл корным палемдыме. Эн палыжлан Йошкар-Ола-Санчурск корно шотлалтеш. Тудым 15 ий наре олмыктымо огыл ыле. Корно мучко 30 ял верланен, тушто 15 тӱжем еҥ ила. Россий Президентын кӱштымыж почеш, норматив марте корнын пӱтынь кужытшымат шуктымо. Тудо 37 наре уштышыш погына. Олмыктымаште йӱштӧ ресайлинг йӧным кучылтмо, тыгыде кӱ да мастикан асфальтобетоным шарыме, корно лӱдыкшыдымылык шотышто пашам шуктымо. Йошкар-Оласе Ленин проспект ик эн кӱлешан уремлан шотлалтеш. Туштак 119 метр кужытан тӱҥ кӱвар верланен. Тудо олан рӱдӧ ужашыж дене эҥер вес могыр ужашыжым ушен шога. Урем мучко социал-кӱлешан объект- влак верланеныт: кок вуз, Йошкар-Ола администраций да Республикын правительствыже, арбитраж суд, Шкетан лӱмеш калыкле театр, ужалкалыме да каныме комплекс- влак, Тазалык Аллей да шуко молат. Туштак 1 май, Сеҥымаш кече, Российын кечыже, Пеледыш пайрем да моло пайрем мероприятий- влак эртат. Тений туштак республикын 100 ияш лӱмгече пайремже лиеш. Олмыктымо уремын ужашыже кум меҥгат 500 метр утла лийын. Тушто 224 канализаций вынемым олмыктымо, 8 тӱжем наре метр бордюрым вашталтыме, машина коштмо да йолын коштмо вер- влакым, транспорт чарныме верым ачалыме. Эн кумда да эн кужу Йошкар-Ола- Уржум корно- 136 уштыш. Тудо республике мучко ныл район гоч Киров область дене чек марте, вара умбакыже Уржумыш кая. Тиде республике кӱкшытан корнылан шотлалтеш. Тудын икмыняр ужашыштыже олмыктымо пашам шуктымо. Тидын годымак автопавильон, транспортыш шичме площадке- влакым олмыктымо. Ятыр сигнал меҥге, корно пале, барьер савар ышталтын, вӱд йогымо пуч- влакым вашталтыме. Тушто пашам 2024-ше ий марте шуйымо лиеш. Эше ик олмыктымо паша- Советский посёлкысо кок тӱҥ урем. Нуным ынде посёлкысо эн сай корнылан шотлат. Куд ий жапыште Марий Элыште тӱжемат 15 меҥге кужыт республике кӱкшытан автомобиль корным олмыктышаш улыт. Тиддеч посна Йошкар-Ола агломерацийыш пурышо 200 меҥге кужыт корно ачалалтшаш.