Крешене пайремыш 15 тӱжем наре еҥ ушнен

Теҥгече православий йӱлам кучышо- влак Крешене пайремым палемдышт. Йошкар-Ола администрацийын увертарымыж почеш, оласе рӱдӧ пляжыште йӱштылмӧ верым ыштыме. Тушто теҥгечысе кас марте ныл тӱжемат пеле утла еҥ йӱштӧ вӱдыштӧ чывылталт лектын. Купель пелен ырыме да шокшо чайым йӱмӧ верым ыштыме, утарыше, медицина да полиций пашаеҥ- влак дежуритленыт. А республике мучко ончалаш гын, Крешеньым пайремлымашке 15 тӱжем наре еҥ ушнен. 18-19-ше январьыште республикысе 69 илемыште 106 тӱшка мероприятий эртаралтын. Тӱшка порядкым эл кӧрго органын 200 пашаеҥже, посна оролышо организацийын 30, Росгвардийын 16 сотрудникше да 129 калык дружинник эскереныт. Калыкын шуко погынымо верлаште тӱшка порядкым пудыртымаш лийын огыл.