Йошкар-Ола «Паша Чап ола» лӱман лийын кертеш
Йошкар-Ола «Город трудовой доблести» лӱм верч кучедал кертеш. Российыште Герой ола да воин чап ола лӱм- влак дене пырля илемлан эше ойыртемалтше палышт лиеш. Кугу Ачамланде сарыште сеҥымашке кугу надырым пыштыше ола- влак тыгай лӱмым налыт. Кугыжаныш Дума икымше лудмаште «Город трудовой доблести» чап лӱмым пуртымо шотышто законопроектым пеҥгыдемден. Документ Кугу Сеҥымашын 75 ияш лӱмгечыжлан пӧлеклалтеш. Сар жапыште СССР-ын эрвел кундемлашкыже кок тӱжемат пеле предприятийым да 17 миллион специалистым кусарыме. Нуно фронтлан кӱлешан продукцийым ситарен шогеныт. Тылыште тыршыше- влакын подвигыштым шарнымашеш кодаш манын, Президент «Город трудовой доблести» чап лӱмым пуаш темлен. Инициативе ӱлычын, олала гыч тӱҥалшаш. Кугыжаныш Думын чыла фракцийжын еҥже- влак тиде темлымаш дене келшеныт.