Александр Евстифеев Россий Президентын Посланийже нерген шонымашыжым каласен
Республикым вуйлатыше Александр Евстифеев Россий Президентын посланийже нерген шке шонымашыжым каласен. Теҥгече Российын Президентше Владимир Путин Федерал Собранийлан кажне ийын колтымо посланийже дене выступатлен. Элым вуйлатыше кугу тӱткышым демографий да элысе калыкын парышыжлан ойырен. Тыгак кӱлешан ой- влак туныктымо паша, тазалыкаралтыш, законым лукмаш шотышто йоҥгеныт. Президент экономический прогресс да цифровизацийым вияҥдаш ӱжын. Поснак экологий йодышеш шогалын. Кугу Сеҥымашлан 75 ий темме йодышлан кугу вер ойыралтын. Элым вуйлатышын темлымыж почеш Кугу сарын архив материалжын эн кугу да уло тӱнялан почмо архившым ыштыме. Александр Евстифеев посланий нерген тыге каласен: эн ончыч тудо социал корнан лийын. Демографий, еш- влаклан социал полыш, калыкын илышыжым саемдымаш, парышыжым кугемдымаш- тиде тӱҥ йодыш- влак. Президентын мутшо почеш, лач нине корно- влак кугыжанышын ончылныжо тӱҥ верыште шогат. Палемдаш кӱлеш: йоча шочмашым кугемдымаш да моло йодышат ешлан социал оксам кугемдыме дене гына огыл виктаралтеш, а моло полыш дене пырля лиеш- лач тушкак калыкле проект- влакат виктаралтыныт. Марий Элланат демографий йодыш- тӱн верым налеш. Ончыгече гына ме Йошкар-Олаште у йоча садикым почна. Тудо 320 йочам налын кертеш. Тиде- калыкле проект почеш чоҥымо нылымше садик. Кодшо ийын тӱжем утла йочалан верым ситарыме, теният шагал ок лий. Кызыт эше ныл йоча тӧнеж чоҥалтеш, - каласен Александр Евстифеев. Республикым вуйлатыше ешарен: тичмаш налмаште Президентын Посланийже чыла корно денат раш задаче- влакым палемда да тӱрлӧ аланым авалта- экономикым, тазалыкаралтышым, туныктымашым да молымат. Ынде кугу вашталтыш лийшаш. Кӱлешан темлымаш- влак федерал законодательствыш да Конституцийыш пуртышаш вашталтыш- влак шотыштат лийыныт. Тиде посланий республикым вияҥдымаште да кӱлешан йодыш- влакым виктарымаште сай полыш лиеш, - палемден Александр Евстифеев.