Вашке марий калыкын 11-ше Погынжо лиеш

Республикысе тӱвыра министерствыште марий калыкын 11-ше погынжылан ямдылалтме йодышым каҥашыме. Мероприятий тӱвыра министр Константин Ивановын вуйлатымыж почеш эртен. Марий оньыжа Эдуард Александров рашемден: погыным эртараш 8 пашаче группым чумырымо. Республикысе районлаште да марий- влакын тӱшкан илыме кундемлаште 29-ше февраль марте сход- влак эртат. Тушто делегат- влакым сайлат. Икымше мартыште Йошкар-Олаште кугу форумым эртарыме шотышто штаб почылтеш. Тӱвыра министр 17-ше январь марте делегат- влакым кушан вераҥдыме, кушто пукшымо вер- влакым рашемдаш кӱштен. Тыгак рӱдӧ ола делегат- влаклан оҥай да тӱрлӧ тӱвыра программым ончыктышаш манын палемден. Ушештарена: Марий калыкын 11 –ше погынжо Йошкар-Олаште 10-шо 11-ше апрельыште эрта. Рӱдӧ олашкына 412 делегат толшаш. Калык ончылно шогышо пӱсӧ йодыш- влакым вич секцийыште каҥашаш тӱҥалыт.