Россий мучко 80 процент ДТП водитель- влакын корно правилым пудыртымыштлан кӧра лиеда
Идалык еда Россий мучко 80 процент корно траснпорт происшествий водитель- влакын корно правилым пудыртымыштлан кӧра лиеда. Кызыт Россий президентын Указше дене келшышын, корно азаплан кӧра калык колымашым кум пачаш утла шагалемдаш палемдыме. 2024-ше ий марте 100 тӱжем еҥлан шотлымаште колышо еҥ нылыт деч шуко лийшаш огыл. Тышке шуаш манын, декабрь мучашыште Медведево, Волжский, У Торъял районласе корнылаште 6 фотовидеофиксаций комплексым вераҥдыме. Нуным корно вончем, йоча коштмо верлаште ыштыме. ГИБДД-н официальный увер ресурсыштыжо комплексын кушто улмыжым раш пален налаш лиеш. Кызыт республике мучко 67 тыгай комплекс пашам ышта. Тушечын 21-ыже эре ик верыште, 46-шо кусныл коштшо улыт. У ий пайрем кечылаште гына, корно правилым 6 тӱжем гана пудыртымым возен налме. 2019-ше ийыште Марий Элыште 878 ДТП лийын. Тушто 91 еҥ колен да тӱжемат 200 еҥ эмганен. Йӱшӧ водитель- влаклан кӧра 84 ДТП лийын. Тушто 16 еҥ колен да 117 еҥ эмганен. 112 ДТП 16 ияш марте йоча- влак дене лийын. Тыге 3 икшыве ӱмыр лугыч лийын да 124-ын эмганеныт. Фотовидеофиксаций комплекс корно правилым пудыртымашым шагалемдаш полша. Мутлан, Алексеевский посёлкышто нарушений 35 пачаш шагалемын. У Торъял районысо школ воктене шагатыште 40 меҥге писылык дене гына каяш лиеш манын ончыктымо гын, камера 84 километрым возен налын. Сандене корныш лекмеке чыла правилым эскерен, чаткан шукташ темлат.