Журналист- влаклан наградым кучыктымо
Теҥгече республикысе журналист, полиграфий пашаеҥ- влак Российысе печать кечым палемдышт. Эн ончыч Марий Эл правительствын наградыж дене палемдалтше- влакым правительство пӧртыштӧ саламлышт. Республикым вуйлатыше профессионал кече дене саламлышыла тыге каласыш: кажне кечын тендан материалда- влак еҥ- шамыч да событий нерген каласкалат, республикысе илышын чын сӱретшым ончыктат. Интернетын кумдан шарлымыжым ончыде, савыктыме изданий- влакат ончыл верыште кодыт. Савыктыме индустрий предприятий- влак ушемын эксперт группыжын шымлымыж почеш, газетым ужалыме киоскым ситарыме дене Марий Эл Россий мучко 14-ше верым, Юл кундем округышто 2-шо верым айла. Александр Евстифеев погынышо-влаклан тыршен ыштыме пашаштлан тауштен ойлен да награде- влакым кучыктен. Тений «Марий Элын шӧртньӧ перожо» журналист премийым Марий Турек районысо «Знамя» газетын тӱҥ редакторжо Лариса Меркушевалан пуымо. Умбакыже журналист- влакын пайремышт Республикысе курчак театрыште шуйнен. Мероприятийым правительство председательын икымше алмаштышыже Михаил Васютин почын да салам мутым ойлен. Ойыртемалтше- влаклан сулен налме наградым кучыктен. Палемдыме еҥ- влак коклаште мемнан «Марий Эл» телерадиокомпанийын журналистше- влакат улыт. Российысе журналист ушемын Чап грамотыжым марий радион шеф-редакторжо Маргарита Соловьёва ден марий телевиденийын продюсерже Ирина Ильдюкова налыныт. Марий Элын 100 ияш лӱмгечыжлан пӧлеклалтше «Калык верч тыршымаш» шарнымашан медальым марий радион кум еҥже оҥешыже пижыктен. Тиде- радиовещаний службым вуйлатыше Вячеслав Кольцов, корреспондент Алевтина Кузнецова да вӱдышӧ Аркадий Сергеев.
