Марий Эл Кугыжаныш Погын 100 кечаш пашажым иктешлен

Теҥгече Марий Эл Кугыжаныш Погыным вуйлатыше Анатолий Смирнов погын вуйлатышын икымше алмаштышыже Владимир Мухин, алмаштышыже- влак Наталья Козлова да Евгений Кузьмин, структурный подразделенийлам вуйлатыше- влак дене пашаче совещанийым эртарен. Совещанийыште парламентым вуйлатыше Кугыжаныш Погынын икымше 100 кече ыштыме пашажым иктешлен да ончыкылык задачым рашемден. Икымше сессийым эртарыме 2-шо октябрь гыч тӱналын, депутат корпус куд сессийыште республикын 35 законжым да Кугыжаныш Погынын 90 пунчалжым пеҥгыдемден. Нунын коклаште республикын да медицина страхований фондын бюджетыштым пеҥгыдемдыме, Кугыжаныш Погын деч Федераций Советын еҥжым, айдемын праваже шотышто уполномоченныйым палемдыме, «Калык кидпаша мастар» у Чап лӱмым ыштыме, илыш дене кылдалтше тӱрлӧ законым пеҥгыдемдыме. Кум тылзе жапыште кум Депутат кечым эртарыме, Президиумын 10 заседанийже эртен, профиль комитет- влакын 61 заседанийышт лийын. Депутат- влак шке сайлыме округлаштышт пашам умбакыже шуят, Шарнымаш да Чап идалыклан пӧлеклалтше Депутат кечылан ямдылалтмаш кая, 7-ше сессийлан ямдылалтме паша шукталтеш. Тудо 27-ше февральыште лийшаш.