Росгвардийын подразделенийже- влак ончылнышт шогышо задачым тӱрыс шуктеныт

Росгвардийын подразделенийже- влак 2019-ше ийлан палемдыме цель ден задаче- влакым пӱтынек да сайын шуктеныт. Тыгай иктешлымашым ыштыме теҥгече Росгвардийын кодшо ийысе пашажым каҥашыме годым. Заседанийым Росгвардий виктемым вуйлатыше Геннадий Файзуллин вӱден. Калыкле гвардий войскан пашаже шотышто докладым виктем штабым вуйлатыше, полковник Александр Золотов ыштен. Тудо ушештарен: виктемыш СОБР, ОМОН, вневедомственный охрана да моло подразделений- влак пурат. Росгвардий виктемын тӱҥ вийжым Россий Президентын кӱштымыж семынак, кугу мер-политик, спорт, юмын йӱла мероприятйлам эртарыме годым кугыжаныш да мер лӱдыкшыдымылыкым ыштымашке виктарыме. Подразделений- влакын ямде улмышт задаче- влакым грамотно шукташ полшен. 2019-ше ийыште индеш гана командно- штабной тренировко ден тунеммашым эртарыме. Идалык мучко личный состав 205 мероприятийыште участвоватлен. Тидын годым осал пашам ыштыше 310 еҥым кучымо, кокытеланымашым лукшо ӱзгар- влакым тергаш да разминироватлаш 169 гана лекме. Тӱҥ федерал инспектор Пётр Журавлёвын мутшо почеш, Росгвардий самырык структура гынат, кугыжанышым аралыше тӱҥ подразделений- влакым ушен шога. Тудо тыгак республикыште кугу мероприятий- влакым эртарыме годым чаткан службым наҥгайымылан полпред Игорь Комаровын тауштымашыжым каласен.