Йошкар-Олан кучемже Семёновкысо книгагудым олмыкташ сӧрен

ОНФ-ын рашемдаш тӱҥалмекыже, Йошкар-Оласе кучем Семёновка селасе книгагудым олмыкташ сӧрен. Олан бюджетше кӱшеш книгам аралыме верыште пу окнам пластик дене вашталтат да книагудын леведышыжым олмыктат. Пашам тенийсе икымше кварталлан палемдыме. Тиддеч ончыч мер пашаеҥ- влак деке книгагудыш коштшо- влак пӧлемлаште йӱштылан вуйым шийыныт ыле. ОНФ-ын чолга еҥже- влак верышке миен онченыт да чынжымак, ужыныт: кружоклаш коштшо йоча- влакланат, кугыеҥ- влакланат кӱжгӧ вургем дене  шинчашышт верештеш. Уремште 10 градус йӱштӧ гын, кӧргыштӧ улыжат 16 градус шокшым гына шотленыт. Лунчыргышо леведышлан кӧра, вӱд чӱчкыдын йога, южо пӧлемлаште тул уке. Паша кече мучашыште тул ынже пиж манын, книгагудым электротул деч йӧршын ойырат. Тиде книгагудым калыкат йӧрата. 21-ше школ воктене улмыжлан кӧра, тунемше- влаклан класс деч ордыжсӧ мероприятийымат тушто чӱчкыдын эртарат. Сандене ОНФ-ын еҥже- влак ола кучемым ӱшандарашак тыршеныт да тушто нуным колыныт.