Марий Элысе СПИД- рӱдерлан - 30 ий

Марий Элысе СПИД- рӱдерлан 30 ий темеш. 1989-ше ийыште иммунодефицит вирусан еҥ- влак шукемаш тӱналмеке, академик Евгений Чазовын вуйлатыме СССР тазалык аралтыш министерстве СССР-ысе чыла кундемыште посна медицина тӧнежым- СПИД ваштареш кучедалме да профилактике рӱдер- влакым ышташ пунчалым луктын ыле. Марий АССР-ын тазалыкаралтыш министерствыже 1990-шо ий 16-шо январьысе приказше дене тыгай рӱдерым ыштен. Туҥ варчышлан Ольга Литовинскаям шогалтыме. Тиде жаплан 30 ий эртен. Кызыт рӱдерын пашаеҥже- влак диспансер эскерымаште улшо тӱжемат пеле наре еҥым ончат, 70 процентше эмлымашым налеш.