Патыр Муса Галлямов «Манзара» чемпион ӱштӧ верч кучедалеш

Эрла Озаҥысе Кугыжаныш циркын ареныштыже кажне ийын эртарыме «Манзара» спорт да сем премий лиеш. Татарстан республикысе спорт министрын икымше алмаштышыжын мутшо почеш премий кореш кучедалмаш дене пырля кумшо гана эртаралтеш. Сабантуйласе патыр- влак да кореш кучедалмашын 130 килограмм марте нелытан эн сай спортсменже- влак «Манзара» чемпион ӱштӧ верч кучедалаш тӱҥалыт. Тений 2018-ше 2019-ше ийласе эн виян сеҥыше- влак коклаште посна кучедалмаш лиеш. Татарстан гыч Раиль Нургалиев ден Марий Эл гыч Муса Галлямов вашлийыт. Нуно коктынат тӱнян ик гана веле огыл чемпионжо улыт да ятыр шӧртньӧ наградышт уло.