Вараксин кӱварым шушаш ийын шошым олмыктен пытарат

                   Йошкар-Оласе Вараксин кӱварым 2022-шо ийын шошым олмыктен пытарат. Пале лийын: рӱдӧ оласе Водопроводный уремыште Изи Какшан эҥер гоч пыштыме Вараксин кӱварым «Мостремстрой» предприятий ачалаш тӱҥалеш. Контрактын акше 32 миллионат 222 тӱжем теҥгеш шуэш. Тушто кӱвар полотном, тротуарже- влакым олмыктат, тошто асфальтым, саварым кораҥдат, Олмыктымо паша 10 арням налшаш. Контарктым 2022-шо ий апрель марте ыштыме. Вараксино кӱварым 1976-шо ий апрельыште почмо. Тудын кужытшо 127 метр, кумдыкшо 13 метр. 1991-ше ий 12-шо декабрь гыч Вараксин кӱвар лӱмым нумалеш. Ондак тудын воктене Вараксин ял верланен улмаш. Тудын гоч Чарла гыч Яраҥ марте корно шуйнен. 1938-ше ийын мартыште ялым ола радамыш пуртымо да Василий Чапаевын лӱмжым пуымо.
Фото: mk-mari.ru