Республикыштына ковид дене сӱрет палынак начарештын

                Республикыштына ковид дене сӱрет палынак начарештын. Черланыше- влакын писын ешаралтмышт да вакцинацийым ышташ кӱлмӧ нерген Марий Эл правительствыште эртыше пресс-конференцийыште тазалыкаралтыш министр Марина Панькова ден Роспотребнадзор виктемым вуйлатыше Светлана Булатова ойленыт. Ушештарена: черланыше шукеммылан кӧра республикым вуйлатыше Александр Евстифеев у чарымаш- влакым пуртен ыле. Эмлыме верлаште 370 койко верым ешарыме да 740-шке шуктымо. Кызыт шым медицина тӧнеж черле- влаклан полышым пуа. Каныш кечыла гыч сарын ветеранже- влаклан Республикысе клинический госпиталь уэш черле- влакым налаш тӱҥалын да 100 койкым вераҥден. Министрын мутшо почеш, черланыше- влак шукырак пурат. Декабрьыште кокла шот дене 37-41 еҥым пыштыме гын, кызыт 51-52 еҥым эмлаш пыштат. Чылаштын гаяк кок могыран пневмоний пеҥгыдемдалтеш, 60 процентшылан кислород полыш кӱлеш. Ондак кислород полышым вич сутка марте налыныт гын, кызыт 10 сутка наре. Инфекций ятырлан нелынрак эрта. ИВЛ денат шукын пайдаланат. Эн шуко черле улмо годым 18 еҥ наре ИВЛ-ыште лийын гын, кызыт 26 еҥ марте. Роспотребнадзор виктемын ончыктмыж почеш вирус утларак куснылеш. Ситуаций вашталтын. Инфекцийым тӱҥ шаркалыше- влаклан 18 гыч 49 еҥ- влак шотлалтыт. Шукыштын черышт симптом деч посна эрта. Сандене моло еҥлан вашке пижыктен кертыт. Тергыме годым 8 еҥын индийысе, куд еҥын британийысе коронавирусым рашемдыме. Но калык прививкым ыштыкташ ок вашке. Тымарте 64 тӱжемат 400 утла еҥ гына прививкым ыштыктен. Тушечын 52 тӱжемже тичмаш курсым эртен. Тидыже кӱлешын визымше ужашыже гына. Россий мучко вакцинаций 26 процентыш шуэш гын, республикыште 19 процент гына. Коллективный иммунитетым ышташлан 60 процент калык прививкым ыштыктышаш. Тидымат палемдыме: вӱрыштӧ антителан улмыжо прививкылан чаракым ок ыште. Пел ий ончыч черланен лекше- влакын антителашт пыташ тӱҥалын. Сандене нунат уэш черланен кертыт.