Марий калыкын 11-ше погынжын резолюцийже илышыш шыҥдаралтеш

                  Республикыште Марий калыкын 11-ше погынжын резолюцийжым шуктымо паша умбакыже шуйна. Марий Юмын йӱла организацийым вуйлатыше Александр Бирюков да правленийын еҥже- влак республикысе кӧргӧ политике, верысе самоуправленийым вияҥдыме да юстиций министр Михаил Данилов дене пашаче вашлиймашым эртареныт. Нуно Марий Юмынйӱла дене кылдалтше йодыш, Марий Элыште да моло кундемыште тудым кучышо- влакын парваштым пӧртылтымӧ да илышыш шыҥдарыме йодышлан пӧлеклалтын. Вашлиймашыш толшо юстиций министерстве виктемын пӧлкажым вуйлатыше Ольга Катерухина ден эл кӧргӧ политике министерствын пашаеҥже- влак законодательствыште лийше вашталтыш, организацийын уставышкыже вашталтышым пуртымо, элысе субъектлаште юмынйӱла общине- влакын пашаштым юридически пеҥгыдемдыме, план почеш тергымаш, отчётым виктарымаш, кучем дене кылым кучымаш шотышто раш вашмут- влакым пуэныт. Шнуй ото да моло юмынйӱла вер- влакым кугыжаныш велым аралымашке налме шотышто пырля пашам виктарыме сомылым палемдыме. Александр Бирюковын шонымыж почеш, кызыт юмын йӱла органиазцийын пашажым моло регионлаш шарен колтымо йодыш ончылно шога. Поснак, Москошто, Санкт-Петербургышто, Ленинград, Свердлов областьлаште да Башкортостаныште. Тидлан регион- влак кокласе але федерал кӱкшытан статус кӱлеш. Тидлан Российысе юстиций министерстве дене кыртмен пашам ыштыман. Вашлиймаште умбакыжат умылтарыме полышым пуымшо шотышто вашкылым шуяш кутырен келшеныт.
Фото: mariel-news.net