Йоча сад- влак умбакыже чоҥалтыт

                    Республикыштына йоча сад- влакым умбакыже чоҥат. Паша дене коштмо радамыште Марий Элым вуйлатыше Александр Евстифеев Йошкар-Олаште да Медведевыште чоҥалтше кок йоча тӧнежым ончен лектын. Калыкле проект дене келшышын, тений 575 ешартыш верым ыштыме лиеш. Нунын кокла гыч 320 верже Мирный микрорайонышто. Тушто йоча садым кодшо ийын чоҥаш тӱҥалме. Объектым 50 процентлан ыштыме, паша графикым ончылтен шукталтеш. Декабрьыште тудым нӧлтен шуктышаш улыт. Чоҥымо да монтаж пашан акше 222 миллион утла теҥге, ныл миллион утла теҥгелан мебельым налме лиеш. Эше 100 верлан йоча сад Медведево посёлкысо у микрорайонышто чоҥалтеш. Тудым 71 процентлан шуктымо, а августлан ыштен шуктышаш улыт.  Качестве шотышто замечаний уке, но график нелынрак кая. Республикым вуйлатыше чоҥымо пашам вияҥден колташ кӱштен. А олаште йоча сад шке жапыштыже да жапым ончылтен чоҥалтеш.