Тулым йӧртымашке 100 военнослужащий да Росгвардийын сотрудникше- влак ушненыт

                Тулым йӧртымашке 100 военнослужащий да Росгвардийын сотрудникше- влак ушненыт. Таче эрдене Марий Элым вуйлатыше Александр Евстифеев Сосновый Бор посёлкышто оперативный штабын еҥже- влак дене совещанийым эртарен да толшо доброволец да лесник-влак дене вашлийын. Таче военный- влакын чотышт 60 гыч 100 марте еҥлан ешаралтын. Тиддеч посна Россгвардийын республикысе виктемжын еҥже- влак тыршаш тӱҥалыт. Тыгак шикшештеш, но теҥгечысе гай огыл. Тӱҥжо нимомат луштарен колташ огыл, чолган тыршена. Кочкыш, медицина обслуживаний чыла уло,- каласен Александр Евстифеев. Ракет дивизий, Киров область полша. Чуваш республикым вуйлатыше полшаш ямде улмо нерген увертарен. Но ме кызытеш шке сеҥаш тыршена. Тул йӱлымӧ кум вер кодын. Ныл вертолёт пашам ышта. Иктыже таче техобслуживанийыште, кастене пӧртылеш. Тулым тӱвыт йӧртымеш пашам ыштена. Икымше сентябрь марте чыла йӧрташ кӱлеш,- каласен Глава. Эше ик гана шке кумылын тулым йӧрташ ушнышо- влаклан пӱртӱсым да шочмо элым йӧратымылан тауштен ойлен.
              Кызыт йӱлен шогышо чодыран кумдыкшо 27 гектар марте иземын, - увертара МЧС виктем. Тулым йӧртышӧ вий да средстве- влак- тӱжем наре еҥ да 175 технике- куд участкыште верланеныт. Кумытшо- оролымо ял- влак- Студёнка, Шап да Сосновый Бор посёлко- влак. Кум участкыже- Мартын да Чуркан ер- влак, Чернушка эҥер кундем. Нуным чарныде эскерат, ялла йыр чодыра воктелым куралыт. Тиде пашам умбакыжат шуйымо лиеш.