Республикысе чодыраште тул осаллана

                Теҥгече Пӱнчер санаторий кундемысе чодыраште тул чот шарлен каен. Карась ер воктене пожар нерген увер чарныде Республикым вуйлатыше деке пурен шога. Санаторий кундемым арален кодымо. Тушто каныше- влакым эвакуироватлыме. Нунын коклаште Йошкар-Ола, Волжск, Татарстан да Чуваший гыч еҥ- влак улыт. Чылаже 132 канышым да тӧнежын 57 пашаеҥжым тушечын наҥгайыме. 106 еҥым мӧҥгышт намиен кодымо, 26 еҥым «Авангард» рӱдерыш вераҥдыме. Республикым вуйлатышын кӱштымыж почеш нунылан кочкаш ситарыме, медицина полышым организоватлыме.
              Таче йӱдым трассе дене кошташ лиймеке, Марий Элым вуйлатыше тул шарлыме верыш миен да Сосновый Борышто вуйын шогышо- влак дене выездной совещанийым эртарен. Чылаже 180 еҥ да 141 технике тулым йӧртымашке ушнен. Правительстве председательын алмаштышыже Степан Воронцов республикым вуйлатышылан увертарен: ситуаций тергымаште улеш. Кӱлеш решений верыштак приниматлалтеш. Россий оборона министерстве таче эрдене тулым йӧрташ Ульяновск гыч вертолётым колташ сӧрен, Йошкар-Оласе ракет дивизий 10 техникым пуа. Ешарен 
волонтёр- влак ушнат. Йошкар-Ола гыч 200, Медведево гыч 50 еҥ. Сосновый Борышто 32 еҥ да 9 технике дежуритла. Дежурство тыгак Студёнка посёлкыштат шукталтеш. Тушто пилораме да яра шогышо зданий- влак йӱленыт. «Кооператор», «Южный» санаторий, йоча легрьла гыч еҥ- влакым эвакуироватлыме- 104 еҥым, тушечын 84-ше йоча- влак улыт. Нуным Президент школ-интернатыш вераҥдыме, 32 еҥым «Авангард» рӱдерыш кондымо. Республикым вуйлатышын мутшо почеш ситуаций контрольышто, но эркышнаш ок лий. Тулым пытартыш сескем марте йӧртыман. Тулым йӧрташ эн ончыч ушнышо верысе калыклан Александр Евстифеев таум каласен.  МЧС-ын вийже тул ынже шарле манын чыла ышташ тырша. Воктелсе ял – влаклан кызыт лӱдыкшӧ уке. Специалист- влак дежурствым умбакыже наҥгаят. Шым шагат эрдене 150 доброволец тулым йӧрташ полшаш каен. Вара эше 30 еҥан тӱшка ушнен. Кокшайск корно дене транспортлан кошташ чарымаш уло. Тулын авалтыме кумдыкшо ешаралтын. Тудо иктаж 700 наре гектар чодыралан эҥгекым ыштен.

Прошлые выпуски