Самырык утарыше Россий кӱкшытан «Территория смыслов» форумышто участвоватлен

                   Россий МЧС-ын Марий Элысе тӱҥ виктемжын пашаеҥже Илья Глазырин Россий кӱкшытан «Территория смыслов» форумышто участвоватлен. Российысе шинчымашым пуышо  ик эн кугу площадке идалык еда Российысе 85 кундем да тӱнямбалсе 50 утла эл гыч самырык тукымым чумыра. Форумын «Эллан служитлымаш» сменыже Моско областьысе Сенеж ер воктене эртен. Мероприятийыш силовой структурылан 18 гыч 35 ияш марте самырык пашаеҥышт погынен. Специалист- влак опытышт да инициативышт дене ваш палдареныт. Командно- деловой модмаште, шинчымашым вияҥдыме программыште, мастер-класслаште, вашлиймашлаште участвоватленыт. Форумыш икымше гана оборона министр Сергей Шойгу миен. Погынышо- влакым тыгак Россий МЧС министрын икымше алмаштышыже Александр Чуприян саламлен. Вуйлатыше- влаклан шке йодышыжым Илья Глазыринат пуэн. Тудым самырык тукымым патриотизм шӱлышеш шуарыме да  мер илышыш ушымо йодыш тургыжландарен. Тудым зал гыч ик эн оҥай йодышым пуышо семын палемденыт. Палыме публицист, политик консультант да телевӱдышӧ  Анатолий Вассерман шке кидшым пыштыман книгажым кучыктен.
               Марий Элысе МЧС виктемын фотожо.