Парт коклаш 9 тӱжемат 900 йоча икымше гана шинчеш

                   Икымше сентябрьыште республикыштына парт коклаш 9 тӱжемат 900 йоча икымше гана шинчеш. Тунемме тӧнеж- влакым санитар да эпидемиологий йодыш шотышто Роспотребнадзор виктем эре тергымаште куча. У тунемме ийыште 253 школ омсажым почшаш. Нунын кокла гыч кокытшо частный, кудытшо изи комплектанлан шотлалтыт. Кок тунемме тӧнежын пашажым жаплан чарен шогатыме. Чылаже школыш 83 тӱжемат 532 йоча толшаш. Частный школлаште 156, изи комплектан школлаште 138 икшыве тунемеш. 221 школ икымше сменыште пашам ышта, 12 тӱжемат 500 тунемше кок смене дене тунемаш тӱҥалеш. Чыла школыштат пукшаш тӱҥалыт. Нунын кузе пашам ыштымыштым Роспотребнадзор виктем терген шога. Палемдыме чыла санитар-эпидемиологий законым пудыртымаш шотышто, 214 тергымаш деч вара ситыдымашым кораҥдаш 236 предписанийым пуымо. 190 школышто 210 предписанийым тӱрыс шуктымо, 23 документше тергымаште улеш.