Республикыште чодыра пожарым йӧрташ начар корныштат коштын кертше технике полша
Республикыште чодыра пожарым йӧрташ начар корныштат коштын кертше технике полша. Теҥгече Марий Элым вуйлатыше Александр Евстифеев ик эн неле участкыште, Чернушка посёлко воктене тул чот ылыжме верыште лийын. Тушто тудо начар корныштат коштын кертше шкеныштын виян машинашт дене толшо доброволец- влак дене мутланен. Воктенак ял верланен, а ик-кок меҥге гыч федерал корно кая. Сандене тушто паша ик минутланат ок чарне. Юлтехын тунемме да опытым эртарыме чодыра озанлыкшын директоржо Николай Попов увертарен: нунын шӱдӧ наре еҥан группышт кум меҥгат пеле кужыт чекым эре эскерен шогат. Тулым йӧрташ шке кумылын толшо- влак дене мутланышыла Александр Евстифеев могай замечаний да темлымаш уло манын йодын. Николай Попов каласен: мо кӱлеш чыла уло, кочкыш сита, шокшо кочкышым жапыштыже конден шогат. Вездеход- влакын толмыштат пеш жапыштыже да кӱлешан улеш. Республикым вуйлатыше джип- влакын озашт денат мутланен. Нунын кокла гыч ятыржын поро кумыл пашам шуктымо опытышт уло, моло кундемлаштат тулым йӧрташ полшат. Мом кугу машина дене вашке ышташ ок лий, изи дене ме пеш вашке кудалыштына,- каласеныт нуно. Тыгай машина дене угыч пижше тулым шекланаш, вӱдым, кочкышым шупшыкташ пеш йӧнан. Республикым вуйлатыше нунылан таум каласен. Вездеход оза- влак вуйлатыше деч топливым умбакыжат ситарен шогаш йодыныт, ойырымо лимит мучашыш лишемеш маныныт. Республикым вуйлатыше вуйын шогышо- влаклан ГСМ дене йодышым теҥгече кастенак виктарен колташ кӱштен. Тидымат палемден: йӧн лиймеке йӱлышӧ верлаште у пушеҥгым шындаш тӱҥалыт. Теҥгече каслан йӱлен шогышо верже 34 гектар марте шагалемын. Чылаже тӱжем наре еҥ да 175 технике пашам ышта.