Йоча каныш

Республикысе правительстве пӧртыштӧ йоча-влакын каныме да кап-кылыштым тазаҥдыме кампанийым эртарыме шотышто погынымаш эртен. Правительстве председательын икымше алмаштышыже Михаил Васютин палемден: 2021-ше ийыште йоча канышлан эшеат кугу тӱткыш ойыралтеш. Россий президентын Посланийыштыжат тидын нерген ойлалтын, йоча лагерьлашке билет акым пелыжлан иземдаш темлалтын. Йоча каныш шотышто йодыш-влак Россий просвещений министерствыштат, Айдемын праважым аралымым эскерыме шотышто федерал службыштат эре каҥашалтыт. Республика кӱкшытыштат чыла кӱлеш паша ышталтеш. Республикысе туныктыш да шанче министр Наталья Адамован мутшо почеш, Марий Элыште йоча каныме да кап-кылым тазаҥдыме организаций-влакым ик реестрыш пуртымо. Тушто йоча-влакым кеҥеж жаплан вашлийше каныме тӧнеж-влак нерген тӱрыс увер уло. Тений кеҥежым лагерьлаште шукырак йоча канен кертше манын, профильный смена-влакым ыштат республикысе бюджет гыч 17 миллион теҥге оксам ешарен ойырат.