Провой кундемыште- у футбол пасу

                Звенигово районысо Красногорский посёлкышто у футбол пасум Марий Элым вуйлатыше ончен лектын. Тений тиде стадионым капитально олмыктымо. Футбол дене модмо верын негызшым тӧремдыме, у искусственный шартышым налме, ончышо- влаклан теҥгылым вераҥдыме, вургемым вашталтен чийыме ырыктыман верым ыштыме. Спорт- туризм министрын мутшо почеш, тыгай поле республикыште кокыт гына. Иктыже Волжскысо МарБУМ-ын стадионыштыжо. Тыгай шартыш асфальтыш ок шаралт, а вер кӱнчалтеш, кӱм оптат, вара тыгыде кӱым, ӱмбакыже ошмам. Тыгай пасум тӧрлашат куштылгырак, шартышым поген налаш да уэш шараш лиеш. Телымат сайын эрта. Футбол республикыште базовый спортлан шотлалтеш. Тудын дене 12 тӱжем утла еҥ кылым куча. Тушечын 800-ыжӧ- олимпий резев спорт школлаште тунемеш. Красногорскыштат футболым йӧратат, 12-17 ияш-влак гына 100 еҥ улыт. Республикым вуйлатыше тыгай футбол пасум шукемдаш кӱлеш манын. Футбол командын тренержылан ик сетке мечым пӧлеклен.