Шушаш ийын шокшо вӱдым кок арня огына вучо
«Т Плюс» компанийын Марий Эл ден Чувашийысе филиалже шушаш ийын теплосетьым тергыме да олмыктымо годым Йошкар-Оласе пӧртлаште шокшо вӱдым чарыме жапым шагалемдаш да 10 кече марте кӱчыкемдаш шона. Тидын шерген шижтарымашым Йошкар-Оласе икымше номеран ТЭЦ-ыш колтымо. Жапым кӱчыкемдыме нерген решенийым калыкын интересшым шотыш налын ыштыме. Тидыже олмыктымо да профилактике пашан качествыжым ок начаремде. Кызыт чыла регионыштат жапым шагалемдаш тыршат. Тидыже теплосетьым утларак олмыктымо да оборудованийым уэмдымашке компанийын шукырак оксам пыштыжлан кӧра лийын кертын. Тений Йошкар-Олаште теплосетьым олмыкташ 74 миллион теҥгем кучылтмо, 850 метр коммуникацийым олмыктен уэмдыме, теплоизоляцийым вашталтыме, учёт приборым вераҥдыме, олмыктымо деч вара кундемлам тӱзландарыме.