Марий Эл правительствыште республикыштына калыкле проект- влакым кузе шыҥдарыме пашан кокла лектышыжым онченыт

              Марий Элым вуйлатыше Александр Евстифеевын эртарыме совещанийыште республикыштына калыкле проект- влакым кузе шыҥдарыме пашан кокла лектышыжым  онченыт. Республикым вуйлатыше палемден: икмыняр проект дене, мутлан, «Качестван лӱдыкшыдымӧ корно», проект дене паша ончылтен шукталтеш. Но арня еда терген шогымым йодшо паша- влакат улыт. Тӱҥ докладым промышленность, экономически вияҥмаш да торговля министр Станислав Крылов ыштен. Тудын мутшо почеш, 24-ше ноябрьлан шотлымаште, индеш миллиардат 500  миллион теҥгем кучылтмо. Регионысо 28 проект гыч 10 проектше дене федерал оксам тӱрыс кучылтмо. Кызыт республикысе исполнительный кучем орган исполнительный кучемын федерал органлаже дене лимитым 83 миллион теҥгелан иземдыме шотышто ещартыш соглашенийым пеҥгыдемдыме пашам шукта. Совещанийыште тӱткышым йодшо чыла йодышым каҥашен лекме. Мутлан, проектлам шыҥдарымаште могай организаций ден подрядчик пашам ыштат, могай куатышт уло- тидын шотышто тергыме пашам вияҥден колтыман. Теве, Медведевыште 825 верлан школым чоҥымо годым подрядчик проектын 10 процентлан шергештмыж нерген каласен. Тыге лийшаш огыл,- манын республикым вуйлатыше. Тидымат ешарен: проектлам шыҥдараш ойырымо окса шагал огыл. Сандене чыла проектшат жапыштыже да сай качестве дене шукталтшаш.