Марий Эл деч сенатор- влак поро кумылым ончыктымо выставкышке миеныт

             Марий Эл деч сенатор- влак поро кумылым ончыктымо выставкышке миеныт. Тенгече Федерацй Советыште элнан илышыштыже кӱлешан йодыш- влакым ончымо заседаний эртен. Тиде кечынак парламентын кӱшыл палатыжын зданийжын фойештыже сӱретче- влакын «Россия- мир неограниченных возможностей» ойыртемалтше ончерышт почылтын. Кӱшыл палатын спикерже Валентина Матвиенко палемден: южо пашаже чоным вошт тарвата, поснак, мутлан, ик пашажым ДЦП черан сӱретче ыштымыжым пален налмеке. Выставкым «Чаракдыме тӱня» поро кумыл фонд ямдылен. Паша- влак коклаште Марий Эл гыч автор- влакынат сӱретышт уло. Тиде- Андрей Чижов, Александр Минилбаев да Инна Батурина. Нунын пашашт шочмо мландын моторлыкшылан пӧлеклалтын. Марий Эл деч сенатор- влак Константин Косачёв ден Сергей Мартынов тыгай тӱҥалтышын кӱлешан улмыжым палемденыт да мемнан Республике гыч сӱретче- влакын чыла  радынаштым шке оксашт дене налыныт. Погынышо шийвундым автор- влаклан кучыктат.