Вакцинацийым эртыдыме пашаеҥ- влакым пашаш огыт пурто

                   Кокымшо декабрь гыч вакцинацийым эртыдыме пашаеҥ- влакым паша деч кораҥдаш палемдыме. Эрла гыч Йошкар-Оласе предприятий ден организацийлаште сотрудник- влакын прививкым ыштыктымыштым тергаш да ыштыктыдымыжым паша гыч кораҥдаш тӱҥалыт. Республикысе кугыжаныш тӱҥ санитар врачын пунчалже почеш полыш да социал сферыште тыршыше, транспорт, тӱшкан кочмо, илыме вер да коммунал озанлык, промышленный предприятий да продукцийым лукшо предприятий, моло вере пашам ыштыше- влаклан обязательный вакцинацийым пуртымо. Документ дене келшышын, организацийлам вуйлатыше да посна амалкалче- влак шке пашаеҥыштлан икымше декабрь марте вакцинацийым эрташ йӧным ыштышаш улыт ыле. Тиде жапыште прививкым ыштыктыдыме еҥ- влакым пашаш огыт пурто да нунылан пашадарым огыт тӱлӧ. Тазалыкаралтыш министр Татьяна Бастракован мутшо почеш, вакцинацийым утларак ышташ тӱҥалмылан кӧра гына, черланымаш изем толеш. Вакцинацийым 80 процент кугыеҥ ыштыктышаш, ик кечыште кокла шот дене кум тӱжемат 500 еҥ прививкым ыштыкта. Пытартыш кечылаште заданийын планже эсогыл эртарен темалтеш. Республикыште прививкым ыштыше еҥ- влак коклаште вакцинын пайдалыкше 95 процентыш шуэш. Моло вич процентше айдемын тазалыкше деч шога. Прививкан- влак коронавирус дене черланен кертыт, но черышт куштылгын эрта,- каласен тазалыкралтыш министрын алмаштышыже.