Республикын кугыжаныш парымже изем толеш

               Тений идалык тӱҥалтыш гыч Марий Элын Кугыжаныш парымжым 901 миллионат 500 тӱжем теҥгелан иземдыме. Тичмаш налмаште 2017-ше ий годсек парымым кок миллиардат 500 миллион утла теҥгелан шагалемдыме. Умбакыже порысым шагалемдыме йодышым Александр Евстифеевын эртарыме совещанийыште каҥашыме. Тушто палемдыме: кугыжаныш парымын кугытшо 10 миллиардат 998 миллион теҥге кодын. Тений гына, кугыжаныш кучем тудым 901 миллионлан иземден кертын. 2017-ше ийыште парымын кугытшо 13 миллиардат 500 миллион утла теҥге лийын. Тачысе кечылан парымын 51 процентше бюджет кредит, 49 процентше банклан кредитышт да облигаций- влак. Парымым обслуживатлаш кучылтмо роскот 2017-ше ийыште ик миллиардат 32 миллион теҥге лийын гын, 2021-шо ийыште 463 миллион марте иземын. Тений гына роскотым аныклымаш 79 миллион теҥгеш шуын. Республикым вуйлатыше кугыжаныш парымым  иземдыме шотышто пашам умбакыжат виктараш кӱштен. Молан манаш гын, тиде йодышым чаткан виктарен толмаш кӱлеш лийме годым федерал правительствын экономик блокышкыжо йодмаш дене лекташ йӧным пуа.
             Фото: Марий Элым вуйлатышын организаций да аналитик виктемже.