Марий Элын турист маршрутшо Россий конкурсышто ГРАН-ПРИ-м сеҥен налын
«Вкуснойошка!» турист маршрут Россий кӱкшытан «Талукын маршрутшо» турист премийыште ГРАН-ПРИ-м сеҥен налын. Тудо «Эн сай кӱртньӧ корно тур» номинацийыште сеҥышыш лектын. Тений «Талукын маршрутшо» премийым налаш Российын 60 регионжо гыч 445 проектым пуэныт. Финалже ноябрь мучашыште Пермь олаште эртен. Ушештарена: «Юл кундемыште волгыдо каныш кече- влак. Тамлын каена. ТутлоЙошка!» проект тений апрельыште тӱҥалын. Тунам Йошкар-Олаш Самара гыч 342 пассажир дене икымше турист поезд толын ыле. Нуно кече мучко Йошкар-Ола, тӱвыра, кухньо дене палыме лийыныт. Вара Пенза ден Ульяновскысо калыкланат Йошкар-Олаш турым эртарыме.