Тошто пӧртла гыч калыкым кусарыме паша умбакыже шуйна
Республикыштына тошто пӧртла гыч калыкым кусарыме паша умбакыже шуйна. Тиде тылзе тӱҥалтышыште рӱдӧ олаштына у пачеран лийше пиалан еҥ-влак ешаралтыт. Петров уремысе 32-шо пӧртын эше ик подъездшым эксплуатацийыш налшаш улыт. Калыкым кусарымаш «Илыме вер да оласе кумдык» калыкле проектын федерал программыж почеш шукталтеш. Проект кышкарыште Российысе кундемлаште 2017-ше ий икымше январь марте аварийныйлан шотлымо пӧртла гыч еҥ- влаклан у илыме верым пуат. Чылаже 15 аварийный пӧрт гыч 204 еҥ пӧртсийым палемда. Ятыржылан у пошкудо- влак дене палыме лияш верештеш. Теве Транспорт уремысе 68-ше А пӧрт гыч 28 еҥ, Куйбышев уремысе 51-ше пӧрт гыч 27 еҥ куснат. Йӧнан чапле пачер- влак ямде улыт. Кызыт тӱшкан пайдаланыме верлаште отделке паша мучашлалтеш. Пордрядчик пӧрт воктел кумдыкымат тӱзландарен, йоча площадкым, парковкым ыштыме.
