Коммунал инфраструктурым уэмдымаш калыклан пуымо полышын качествыжым палынак кугемда
Марий Элыште коммунал инфраструктурым кумдан уэмдымаш калыклан пуымо полышын качествыжым палынак кугемда. Таче Марий Элым вуйлатыше Александр Евстифеев Российыште регионлам вияҥдыме шотышто Правительстве комиссий президиумын заседанийыштыже участвоватлен. Тудым видеоконференций йӧн дене Россий Правительстве председательын алмаштышыже Марат Хуснуллин эртарен. Тушто элысе кундемлаште илыме вер да коммунал озанлыкын могайрак улмыжо, шыже-теле жапым эртыме, ЖКХ-шке частный инвестицийым кондымо йодыш- влакым каҥашыме. Марий Эл Правительстве ончылно шогышо ик эн тӱҥ задаче калыклан илаш лӱдыкшыдымӧ да сай йӧным ыштымаш, качестван коммунал полышым пуымаш. Тидлан коммунал инфраструктурым тӱшкан уэмдыме мероприятий- влак эртаралтыт. Кызыт Козьмодемьянскыште 400 миллион теҥгелан тыгай паша шукталтеш, Йошкар-Ола ден Волжскышто канализаций коллекторым, Советский, Морко, Оршанке районлаште очистной сооруженийым чоҥаш палемдыме. Тиде пашалан чылаже 685 миллион теҥгем кучылташ палемдыме. Инвестиций шотышто ойлаш гын, вӱдым ситарыме, йоктарен колтымо да шокшым ситарыме шотышто 206 миллион теҥгеаш 6 концессий соглашений шыҥдаралтеш.