Тул пижын кертме лӱдыкшӧ тургымлан ямдылалтме паша- влак контрольышто кучалтыт
Тул пижын кертме лӱдыкшӧ тургымлан ямдылалтме паша- влак Правительствын контрольыштыжо улыт. Теҥгече Марий Элым вуйлатыше Александр Евстифеев Российысе пӱртӱс поянлык да экологий министр Александр Козловын эртарыме совещанийыште участвоватлен. Тушто тений чодырасе тул лӱдыкшӧ тургымлан ямдылалтме да чодырам аралыме нерген ойлымо. Вашлиймаш видеоселектор йӧн дене эртен. Александр Козловын мутшо почеш, лӱдыкшӧ тургым кум регионышто тӱҥалын: Астраханский областьыште, Чечен республикыште да Хабаровский крайын ужашыштыже. Тул пижмым Еврей автоном областьыште, Забайкальский да Приморский крайлаште палемдыме. Молгунамсе семынак эн ончыч Тора Эрвелне тул озаланаш тӱҥалеш. Сандене 20-шо март марте тулым йӧртымӧ сводный план- влакым пуаш кӱлеш, тӱн показатель- влакым арня еда обязательно мониторитлаш тӱҥалына,- каласен министр. Марий Элыште чодыран тӱшка кумдыкшо миллионат 423 тӱжем гектар. Эртыше ийын республикына икымше суткаштак тулым писын йӧртышӧ регион- влак коклаш пурен ыле. Шукертсек эскерыме почеш республикыште тул лӱдыкшӧ тургым апрельын кокымшо-кумшо декадыштыже тӱҥалеш. Кодшо ийын тул икымше гана 10-шо апрельыште пижын ыле, пытартышыже- 11-ше октябрьыште. Тӱҥ амалжылан тул дене шекланыде пайдаланымаш да волгенче шотлалтыт. Лӱдыкшылан Звенигово да Медведево районласе чодырам шотлымо. Тулым йӧртымӧ сводный план дене келшышын, тул ваштареш кучедалаш кум тӱжемат 922 еҥым, 595 техникым да вич тӱжемат 400 утла оборудований ден ӱзгарым кучылташ палемдыме. Кодшо ийын республикылан 27 миллионат 500 тӱжем теҥгем ойырымо ыле. Тудын дене 11 техникым, 94 оборудованийым, шым тӱжем метр рукавам налме. Тений 34 миллион утла теҥгелан технике ден оборудованийым налаш палемдыме. Тыгак патрулирований, сутка мучко вашкыл, тулым ылыжташ, чодыраш кошташ чарымаш да моло мера- влак ышталтыт. Тул лӱдыкшӧ тургымлан ямдылалтмашым Марий Эл Правительстве шке контрольыштыжо куча.
