Йошкар-Ола погынымашын депутат кечыже «Водоканалыште» эртен
Йошкар-Ола погынымашын депутат кечыже «Водоканалыште» эртен. Тудо «Водоканал» МУП-ын пашаже» темылан пӧлеклалтын. Экскурсийыште депутат- влак быт пӧлем- влакым ончен лектыныт, вара ончылнышт «Водоканалын» директоржо Рафаиль Киямов ойлен да предприятийым вияҥдыме нерген каласкален. Тиде олалан йӱшаш вӱдым ситарыше ик предприятий гына. Тушто 775 еҥ пашам ышта. Тудо калыклан, предприятий ден организаций- влаклан вӱдым ситара, кучылтмо вӱдым мӧнгеш налеш да эрыктен луктеш. «Водоканалышке» оласе вӱдым ситарыме сеть да водозабор, канализаций сеть да насос станций, очистной сооружений- влак пурат. Кодшо ийын 6 водозабор колонкым, 72 вынемым, 29 пожар гидрантым, 53 задвижкым, 6 келге насосым капитально олмыктымо, 161 аварийым кораҥдыме, кум тӱжемат 810 метр вӱд пуч сетьым норматив марте шуктымо. Элыште пандемийлан кӧра экономикыште ситуаций неле гынат, предприятий паша куатшым иземдыде, утларак сай лектышым ончыкта. Очистной гыч лукмо йошкыным ондак тудо кундемыштак аралыме да Ширяйково ден Сомбатхей микрорайонлаш пуш шарлен гын, ынде тудым карьерыш оптат. Мутланыме годым депутат- влак тургыжландарыше йодыш- влакым пуэденыт. Депутат кечыште ола администрацийлан «Водоканалын» пашажым пеҥгыдын терген шогаш, «Водоканаллан» вӱд пуч- влакым норматив марте шуктымо пашам писемдаш, очистной сооружений- влакым пужен ыштыме пашам, предприятийын леведышыжым, фасадшым, быт пӧлемлажым, офисшым олмыктымо пашам умбакыже шуяш темлыме.
