Козьмодемьянск ола воктене учений эртен
Козьмодемьянск ола воктене Юл эҥерысе рӱдӧ пляжыште тактико- специальный занятий эртен. Тудын темыже: «Телым вӱд объектыште вучыдымо ситуацийым кораҥдыме годым утарыше- влакын пашашт» лӱман лийын. Тудын условийже почеш, пуйто эҥер гоч вончымо годым вич еҥ ий гыч вӱдыш пурен каен. Тидын годымак ий катлен да торлен, а тушто 10 еҥ улмаш. Катлыше ийым Чебоксар ГЭС декыла йоктарен наҥгаяш тӱҥалын. Ученийыште МЧС-ын, граждан оборона комитетын, аварийно-утарыше службын еҥышт участвоватленыт. Нунын деке тӱшка порядкым эскерыше, вашкеполыш бригада да Курык марий район администрацийын еҥышт ушненыт. Тунеммаште шыжым гына налме аэропушым кучылтмо. Тудын кужытшо шым метрат пеле. Сандене бортышко лу наре еҥым налын кертеш. МЧС пӧлкам вуйлатышын мутшо почеш тунеммаш сайын эртен. Утарыше- влак кӱчык жапыште полышым пуэн моштымыштым ончыктеныт.
