Икмыняр еҥ кӱкшӧ лӱм дене палемдалтын
Марий Элым вуйлатыше Александр Евстифеев Чап лӱм- влакым пуымо шотышто Указым пеҥгыдемден. Ял озанлык пашашке пыштыме надырлан «Марий Элысе ял озанлыкын сулло пашаеҥже» чап лӱмым «Хлебниковский» озанлыкын механизаторжо Михаил Маклаков, «Оршанкысе сельхозпром» ушемын генеральный директоржо Зоя Михайлова, «Первый май» колхозын электрогазосварщикше Александр Самарцев налыныт. Тыгак Советский районысо «У илыш» колхозым вуйлатыше Иван Баранов «Марий Эл ончылно надырлан» орден дене палемдалтын. Тӱвыра да туныктымо аланыште тыршен пашам ыштымылан Йошкар-Оласе икымше номеран художественный школын туныктышыжо Мария Клюкина ден «Советский йоча сымыктыш школын» туныктышыжо Ольга Якаева «Марий элысе тӱвыран сулло пашаеҥже» чап лӱмым налыныт.