Юлтех «Приоритет 2030» программын ойырен налме икымше йыжыҥжым эртен

                 Юлтех «Приоритет 2030» программын ойырен налме икымше йыжыҥжым эртен. Кодшо кечылаште Российысе наука да кӱшыл шинчымаш министерстве комиссийын «Приоритет 2030» стратегический акадмический лидерство программыжын участникше- влакым ойрен налме шотышто заседанийже лийын. Юлтехын командыже, тушко ректор Игорь Петухов, президентше Евгений Романов, тӱнямбал кыл шотышто виктемжым вуйлатыше Эльдар Курбанов пуреныт, Юлтехын 2030-шо ий марте вияҥме программыжым арален. Программыште кум стратегий проектым ончыктымо. Нуно калыкле, регионысо да отраслевой экономикын цельышкыже шуаш ик шонымаш дене кылдалтыныт. Юлтех  чодыра паша дене кылдалтше тӱҥ корно деч посна машиностроений, материаловедений, увер технологий, радиоэлектроника, чоҥымаш да архитектура, экономике, социал технологий дене келгын пашам ышта. Тидыже мо нерген ойла: Юлтех Российыште вӱдышӧ интегрированный шанче да туныктымо комплексыш савырнен кертеш. «Приоритет-2030» элнан историйыштыже университет- влаклан кугыжаныш полышым пуышо ик эн кугу программе. Тушко ушнышо- влак вияҥаш кугу шӱкалтышым налыт. Шке проектышым аралаш вузласе 187 команде ушна. Программым аралыме пытарыш йыжыҥ 25-ше сентябрьыште мучашлалтеш.