Йошкар-Олаште олмыктымо вич объектым шыжым пашаш колтышаш улыт
Йошкар-Олаште «Лӱдыкшыдымӧ да сай качестван автомобиль корно-влак» калыкле проект сайын илышыш шыҥдаралтеш. Тений сентябрьыште 8 меҥге кужытан вич объектым тичмаш пашаш колтышаш улыт. Тидлан 300 миллион теҥге окса кучылталтеш. Муниципал контракт дене келшышын, подряд организаций- влак гарантий почеш вич ий жапыште мутым кучаш тӱҥалыт. Йошкар Армий, Кремль, Пролетар уремлан ужашыштыже канализаций да вӱдпуч вынемлам олмыктен пытарыме, бордюрым вераҥдыме, корным тӧремдыше ужашым шарыме. Пашазе- влаклан ушнышо корным, тротуар, транспорт чарныме верлам олмыкташ, газоным тӧремдаш да шудым ӱдаш, корно разметкым ышташ кодеш. Комсомол уремыште асфальтым шарен пытарат. Дружба уремыште пашам тиде арнян тӱҥалме.