Ковид-19 дене черланыме кугыт республикыште 68 процентлан шагалемын
Ковид-19 дене черланыме кугыт республикыште 68 процентлан шагалемын. Тидын нерген республикым вуйлатышылан Оперативный штабын заседанийыштыже Роспотребнадзор виктемым вуйлатыше Светлана Булатова увертарен. Тудын мутшо почеш, Марий Эл кызыт чарыме мероприятийым кораҥдыме кокымшо йыжыҥыште улеш. Ковидын шарлыме коэффициентше пытартыш вич кечыште 0, 94 шӱдаш гыч 1, 04 шӱдаш марте кучалтеш. Пытартыш 12 кечыште ик кечылан шотлымаште черланыше- влакын чотышт 31 еҥым эртен огыл, кокла шот дене кажне кечын 28 еҥын чержым пеҥгыдемдат. Тиддеч ончыч кажне кечын 48 еҥ наре рашемдыме. Туге гынат чер шарлен кертме лӱдыкшӧ уло. Молан манаш гын, тудо лишыл еҥ- влаклан, паша верлаште да медицина тӧнежлаште пижын кертеш. Чер тыгак тӱшка транспортыштат шарлен кертеш. Сандене маске дене коштмо режимым терген шогыман, - каласен Светлана Булатова. Тазалыкаралтыш министр Марина Панькова койко фонд нерген ойлен. 8 медицина организацийыште 810 койко уло. Пытартыш арняште эмлыме верыш пыштыме еҥ- влакын чотышт 6 утла процентлан ешаралтын. Шукыжын пневмоний шотлалтеш. Министр тыгак ковид деч вара осложнений лийме нерген увертарен: шӱлаш нелылык, шоло-пагар трактын начар ыштымыже, психологий да неврологий нарушений, чогашылын иземмыже палдырнен кертеш. Промышленность министр Станислав Крылов экономикым ӱшанлын вияҥдыме тӱҥ мероприятий- влак нерген ойлен. Александр Евстифеев Российын Минпромторгшо дене пырля предпринимательствылан полшымо пашам умбакыже шуяш да лишыл жапыште отчётым ышташ кӱштен.