Курык марий, Юрино районлаште да Козьмодемьянск олаште электротул деч посна кодыныт
Теҥгече йӱр да таул мардеж Курык марий, Юрино районлаште да Козьмодемьянск олаште электролиний- влаклан эҥгекым конден. Тул деч посна 24 тӱжем утла еҥ кодын. Эҥгекым кораҥдыме паша нерген Республикым вуйлатыше Александр Евстифеевлан правительстве председательын икымше алмаштышыже Александр Сальников увертарен. Юрино районышто ик шагат жапыште тулым пӧртылтымӧ. Вес вереже шукырак жапым йодын. Кум электромеҥге сӱмырлен. Курык марий район ден Козьмодемьянск ола тулдеч посна кодыныт. Олмыкташ 26 технике да 70 еҥан 20 аварийно- тӧрлышӧ бригадым ушымо, 33 резерв источникым пашаш колтымо. Кызыт олмыктымо паша мучашыш лишемеш, эше вич тӱжем еҥ деке электротул толын шуын огыл. Лишыл жапыште чыла ыштен шуктышаш улыт. Александр Евстифеев тиде пашам контрольышто кучаш да увертарен шогаш кӱштен. Игече вучыдымо сӱретым шуко ончыктен кертеш, сандене чылалан ямде лийман, - каласен тудо.