Шереметевмыт замкыш вуйлатыше- влак погыненыт

Шереметевмыт замкыште тӱшка шымлымашым да реставрацийым ыштат. Шереметевмыт илемын Тӱҥ пӧртшым «Тӱвырам да туризмым вияҥдымаш» кугыжаныш программыш пурталтымо. Тиде тӱвыра поянлыкым арален кодымо ончыкылык да проблемыже- влакым замкыште эртыше совещанийыште каҥашыме. Тӱвыра министр Константин Иванов палемден: кодшо ийын аварий ваштареш шуктымо пашалан кӧра, пӧртын касвел могыржын негызшын тичмашлыкшым арален кодымо да фундамент деке вӱд толмым чарыме. Эксперт- влакын ончен лекмышт почеш, пӧрт шичмылан кӧра, ятыр шелше- влак койыт, чын амалже эше пале огыл. Молан манаш гын, пӱтынь пӧртым комплексно шымлымаш эртаралтын огыл. Пӧртын ужашыже- влакым тӱрлӧ жапыште чоҥымо да тӱрлӧ фундаментеш нӧлтымӧ. Нуно кызыт чот шинчыт. Эксперт группым вуйлатыше Игорь Егоров тӱшка шымлымашым да олмыктымашын тӱҥалтышыжым ик жапыштак  шукташ темлен. Федераций Советыште Марий Элын представительже Константин Косачёвын мутшо почеш, тиде тӱшка да тичмаш мутланымаш лийын. Раш лектышыже- реставраций, Шереметев замкым тичмаш уэмдымаш да могайым ышташ шонымо, тудо тугаяк лийшаш. Ушештарена: республикылан 100 ий теммым палемдыме тӱҥ мероприятий- влак кышкарыште замкын Теле садшым олмыкташ палемдыме. Тидлан федерал да республикысе бюджет гыч 20 миллион утла теҥге оксам ойырымо.