Ленинский посёлкышто мемориал комплексым почмо

Марий Элым вуйлатыше Александр Евстифеев Юрино районысо Ленинский посёлкышто мемориалым почмаште лийын. Кугу Ачамланде сарыште лийше да тылыште тыршыше- влаклан мемориал комплексым посёлкысо эн чолга еҥ- влакын- Антроповмыт ешын тӱҥалтышыж почеш Йошкар-Оласе Электросетевой компанийын полшымыж дене чоҥымо. Геннадий Антроповын мутшо почеш, ончычсо мемориалым пӱтынек рончымо, мрамор постаментеш уэш кум плитам вераҥдыме. Тушто 134 ветеранын лӱмыштым возымо. Тыгак у саварым ыштыме, воктелсе кумдыкым тӱзландарыме, пеледыш ден кожым шындыме. Чыла пашам ныл тылзыште шуктымо. Республикым вуйлатыше Александр Евстифеев ден Федераций Советыште Марий Элын представительже Константин Косачёв вуйым пыштыше- влакым шарналтен, чапкӱ воктеке пеледыш ден гирляндым пыштеныт. Журналист- влаклан пуымо интервьюштыжо Александр Евстифеев мемориалым ыштыше- влаклан чылаштлан таум ыштен. Мучашлан Александр Евстифеев ден Константин Косачёв волонтёр да посёлкысо калык дене пырля  «Шарнымаш сад» акций кышкарыште пушеҥгым шынденыт.