Республикына йот элыш шукырак сатум колта
Промышленность Министр Станислав Крылов Республикысе инвестиций да экспорт вияҥмаш агентствын вуйлатышыже Дмитрий Васенин дене пашаче вашлиймашым эртарен. Нуно агентствын тений икымше пелийысе пашажым ончен лектыныт да коронавирусым шотыш налын, идалык мучаш марте планжым каҥашеныт. Тений экспортын кугытшо кум миллиард утла долларым эртен, изи да кыдылаш бизнесын 62 компанийже йотел рынкыш лекме годым агентствын полышыж дене пайдаланен. Тиде жапыште 8 компаний йотэлыш икымше гана сатум колтен, вич субъект электрон ужалкалыме площадке гоч сатум колтен.