Шояк уверым шаркалышылан 10 миллион теҥге марте штрафым тӱлыктен кертыт
Коронавирус нерген шояк уверым шаркалышылан 10 миллион теҥге марте штрафым тӱлыктен кертыт. Федераций Совет санитар- эпидемиологий правилым пудыртымылан мут кучымашым пеныдемдыме нерген законым сайлан шотлен. Шояклан ынде 7 ийлан эрык деч посна коден але 10 миллион теҥге штрафым тӱлыктен кертыт. Лӱдыктышӧ увер- влакым ончычат шаркаленыт. Тиде шояк уверже южгунам коронавирус дечат вияҥрак лийын кертеш. Модаш йӧратыше- влак республикыштат улыт. Шукерте огыл ик тыгай еҥ вируслан кӧра корным петырат манын увертарен. Но тудо, очыни, эртен кудалше лийын. Республикысе калык тыглаят пала- корным военный- влак жапын-жапын тунеммашлан кӧра петырат. Тыгай умылыдымаш ынже лий манын, Федераций Совет санитар-эпидемиологий правилым пудыртымылан уголовно мут кучымашым вияҥдыме шотышто законым сайлан шотлен. Тыгак административный нарушений шотышто Кодексыш тӧрлымашым пуртымо. Калыкын лӱдыкшыдымылыкшӧ да илышыжлан лӱдыкшым лукшо обстоятельстве нерген шояк уверлан 300 гыч 700 тӱжем теҥге марте штрафым тӱлыктат але 18 тылзе марте пашадар оксам кучен кодат. Але кок ий марте пашам ыштыктен, але кум ий марте эрык деч посна коден кертыт. Шояк увер тазалыклан эҥгекым конден гын, миллионат пеле марте штраф вуча, Тыгай уверлан кӧра айдеме ӱмыр лугыч лийын гын, кок миллион теҥге марте штраф але вич ийлан эрык деч посна коден кертыт. Юридический лица- влаклан наказаний эше кугурак. Тиде увер айдемын тургыжланымыже кӱшеш осал маскарам ышташ йӧратыше- влаклан. А тыглай калык тӱрлӧ манеш-манешлан ӱшанышаш огыл, лач официальный уверлан гына эҥертышаш.